咖喱魷魚魚蛋相信大家都唔陌生。我記得以前舊式涼茶鋪，佢哋有賣“扎體”｀蘿蔔糕｀咖喱魷魚魚蛋。。。 等等小食，而我最記得嘅，就係咖喱魷魚嘅味道。應該點樣形容哩種味道呢？ 嗯。。。有一種舊式情懷，簡單直接嘅味道。所以呢種咖喱唔會好似泰國咖喱｀印度咖喱｀馬來西亞咖喱咁樣有椰奶味｀咁creamy同咁流質。相對地，呢種舊式咖喱，係比較乾身，可以話似“乾撈”。之前以為好容易整，但原來搵齊材料都已經好煩。當然白蘿蔔同炸魚蛋，好多街市都有。但係魷魚就要係海味鋪買嗰種，深啡色、兩至三隻手咁大嘅乾魷魚＼吊片。重點係：唔係間間海味鋪有得賣。 第二樣難買就係鹼水！要係嗰啲街市舊式雜貨鋪買。都係嗰個問題：唔係間間雜貨鋪有賣！點解要買鹼水呢？ 因為如果你做食市，你應該知道只有鹼水先可以發得開啲魷魚。點解唔買街市嗰啲水魷啊咁？ 因為個種水魷，完全無魷魚嘅香味。 咁新鮮嘅魷魚呢？ 嗰分別就好似，你食鮮鮑魚同乾鮑，後者一定味濃好多！反正一定要用乾魷魚，先做到傳統港式咖喱魷魚嘅味道。 

就係買呢種乾魷魚/吊片

材料：

魷魚   3隻

魚蛋   1斤

白蘿蔔   1條

蒜頭   12瓣

咖喱膽   50ml 

沙爹醬（無花生嗰種）   50ml

水   350ml

鹼水   2湯匙

蠔油   2湯匙

生粉   3茶匙

椰奶   3茶匙

冰糖   3小粒（好似方糖size）

做法：

- 先用一大碗水係剛剛好浸到魷魚，再落鹼水浸發魷魚大概六個鍾，發好之後去骨切好備用 （記得要洗乾淨啲鹼水，如果唔係食咗會引起過敏）

- 燒開一鍋水黎煮熟煮林啲白蘿蔔（煮嗰時可以落少少酒黎去蘿蔔啲腥味）大概30分鍾，煮林煮好瀝乾水備用

- 用個鍋落啲油，先爆香啲蒜頭

- 再落咖喱and沙爹醬爆香

- 落水煮滾

- 落蠔油 冰糖 椰奶 煮滾

-落白蘿蔔煮10分鐘

-再落埋啲魚蛋魷魚煮滾

- 落生粉埋'hin'（記得用啲啲凍水搞勻先落去滾）搞掂！

因為每次整哩味野都搞我大半日，所以我一整都會整多啲，而以上份量大概係4-6人份量。